De Kall mähnt: Schprung in de Schissl

Isch weeßda nädd, midd dännä Essgewøhnheidä iss des jo heid so ä Sach, gell. Mehr veggädarisch odda sogaa vegøøn wollä sich mehr unn mehr Leit ernehrä. Unn nädd blooß Jungä, a äldarä Gsundheitsbewusssdä gibt’s imma mehr. Solläsä, iss jo guud, wømma wänischa Fleesch essä duud. Allä schunn fä die Viehschalinn – unn nadierlisch a fers Choleschderin. Ob midd odda ohnä Fleesch – fä jungä Leit gibt’s jo trändgemeeß imma neiä Modä. Dess wa schunn imma so. Italienisch in de 60er, griechisch in de 70er, schpønisch in der 80er unn thailännisch in de 90er hosch essä missä, wønn de mitreddä hoschd wollä. Uff die ømerikønischä Kedd midd dämm großä gelwaä „M“ sinn dønn individuellä Döna-Budä kummä und ärschd in dämm Jahrdausänd sinn klänä Hømburga-Leedä uffkummä, die „Böörga“ vakaafä – durchaus mit Ärbsä-Brätling unn Avocado schtatt Schpeck druff.

S’Neischdä awwa, hald eisch feschd, iss derzeit hawaiønisch! Do gibt’s dønn so genønndä „Bowles“, also „Bøuls“ – Schisslä uff gud deitsch. Kømisch, isch habb friah imma Ärga kriggt, wønn isch aus de Schisslä wasss schdibitzt habb. „Aus de Schissl isst ma nädd! Was glaabsch du, wofir de Della iss, hä?“

Heit treffä sich junge Leit schnibblä sichs umeeglischsdä Sach zusømmä unn mähne, sie heddä gekocht. Ä paar Bohnä aus de Bix, bissl lauwarmi Ønannass, paar Salatbleddlin, Schprossä unn än klänä Leffl Gemiesäbrieh – und färdisch iss die „Bøul“. Kømma machä, mussma awwa nädd. Isch war mol im Urlaub in Thailønd. Dess schmeckt gut, dänna ihr Sach, kä Froog. Awwa nooch zwee Wochä krigschd jo do änn Schprung in die Schissl, also hawwisch gebleekt: „Isch sachs eisch: Wønn ma heid widdä ännä ä Schissl uff de Disch schdellt, føng isch ø zu bellä! Mir sinn dønn a ball hämgfahrä.

Kontakt: kall@mamo.de