Habt ihr schunnämol middäm Denkmalschutz zu duä khabbt? Isch schunn. Ä Wøhnung wollt isch kaafä, do war ä schänäss aldäs (awwa morschäss unn vafauldäss) Rundbogä-Fenschda drinn. Dess hedd isch erhaldä sollä – unn a wollä, allerdings mit Dobblglasscheiwä. Vumm Schroina, der die Fenschda im Mønnema unn Schwetzinga Schloss gemacht hodd, hedd isch dess originalgetreu machä, also nochbauä lossä. Isch habb dänn gudä Mønn a glei midd uff de Termin middä unnarä (Mønnem) unn owwarä (Kallsruh) Denkmalbehörde gebrocht. Dess war dennä Owwarä unn Unnarä awwa nädd gut genug. Stattdessä hedd isch in dämm 16 qm Zimmerle, ä drei Kubikmeeda großäs Glas-Aquarium mit Dobbl-fenschda vor dess aldä Fenschda bauä lossä sollä. Dess wer zumutbar. Isch hab die Burg nädd gekkaft. Värzäh Daag schpäda bin isch vorbeigfahrä, wie zwee Arweida dess Fenschda mit Vorschleeghämma in än Cøndäna gekloppt hawwä. Jetzt iss ä Plastikfenschda drin – dobblvaglast, so schnell kønns gehä …
Soll isch weida machä? Middä Röchling-Burg in de Ostschtadt? Odda gønz aktuell middä Kauffmønn-Mihl im Jungbusch? Odda dem aldä Barock-Heisl in de Kalt Gass? Schwupp wara weg, de Denkmalschutz, komisch iss dess als, kønnsch disch als Leiä blooß wunnern. So ä Multihall odda unnser so wunndabares Nationaltheada iss do eha erhaltenswert, egal wassäs koscht. Do iss a halwi Milliard „zumutbar“, Mønnem hodd jo viel Geld – unn än gudä Gschmack däzu – unn Unnarä unn Owwarä zuhauf … Wie? Wass mähntda? Dess wer heid nädd lusdisch? Nää, isses a nädd. Awwa ä komisch Sach isses trotzdäm. Beim Thäma „Denkmalschutz“, so sses hald ä mol, kønnsch in Mønnem blooß äns: Groinä!
Kontakt: kall@mamo.de
URL dieses Artikels:
https://www.fnweb.de/leben_artikel,-ansichtssache-de-kall-maehnt-dess-iss-ae-komischi-sach-_arid,2073082.html
Links in diesem Artikel:
[1] https://www.mannheimer-morgen.demailto:kall@mamo.de