De Kall mähnt: Komischä Ooschdern midd Kinnabuch zu vegønä Denkøschdeeß

Soinazeit, also 2021 middä in Corøna werä dess jo komischä Ooschdern gewesä, middä im Lock-down, mähnt de Ginda neilisch, wie ischänn in de Schtadt drinn uffm Maakt gedroffä habb. Nirgännds heddsch hie gedäfft, näddämol rischdisch naus – unn schunn ga nädd midd Leit aus ønnarä Haushaldä unn so weida. „Kønnsch disch noch entsinnä, Kall? Kontrolliert bischdä worrä, Schdroof hoddma zahlä missä, wønn de nädd aus äm gemoinsømä Schdall kummä bisch.“ Wie mir dess de Ginda so zwischä Schpargl fer 20 Euro s’Kilo unn Weidäketzlinn in allä Farwä ausmolt, denk isch, Räschd hodda, de Ginda, furschtbar war dess!

Wie vagesslisch ma doch iss. Biss dohie hawwisch nämlisch gemähnt, dess neiä Kinnabuch zu vegønä Ooschdern wer dess Schlimmschdä gewesä, wass ma zu dännä Feiadaag des Johr oifallt. „Dess blauä Ei“ heeßd dess Buch unn will Denkøschdeeß „zur veganen Lebensweise“ gewwä. Dess heeßd die Hihna, gewwä de Haasä dodrinn kä Eier mehr, damit die se bunt ømølä unn de Kinna in die Oschderneschda legä unn vaschdecklä kennä. „Oifiehlsømä Gschischdä rund ums Thäma Eier“ werrä in dämm neiä Kinnabuch uff die Oschdern vazehlt. Wie isch äm Ginda vazehl, wass ma so dursch de Kopp geht, mähnda: „Unna uns, Kall, de Härrgott vazeih ma, isch froog misch ehrlisch gsacht, wønn se ä Fraa Jesus middäm Blummäkränzl im Hoor selbscht-bestimmt øn Härz-Kreislaufvasagä frieddlisch øm Kreiz – odda womeeglisch øm queer gelegdä „Infinity“-Zeischä oischlofä lossä. Bloos damit känns zu arg vaschreckt wärd!“ Do muss isch dønn bei alla Piädeed schmunzlä. „Mach kää Witz iwwa sowass, Ginda, mir werrä dess nimmee erlewä. Awwa, jetz muss isch weida, dovoor zum Eiermønn. Trotzdääm: Schäni Ooschdärn!“

Kontakt: kall@mamo.de