De Kall mähnt: Blummä unn Beddong

De Härmønn, moin friahrä Lieblingsvamieda, der schiggt ma als ä mol wass. Also kä Geld unn a kää Blummä odda Pralinä, warumm sollda a, ä kriggt jo a schunn løng kä Miet mehr vumma, sondärn so Bilda, Witzelscha, Schprisch und Filmschä uffs Händy. Wie ma dess hald heidzudaag so macht. Uulängschd hodda ma also so än klänä Film gschiggt, do hodds misch ball varissä. Änn Werwäfilm mit Musikk iwwa odda bessa fä die Bundäsgaddäschau ønno 1975. Zu heerä iss die Bundesgaddäschau-„Fanfare“ sowie „Die Kurpfalz Singers“, die schpielä unn singä unn schmeddärn im schäänschdä Volksfeschd-Walza „Willkommen in Mannheim zur Bundesgaaaaartenschau“. Die Fanfare klingt (dreißisch Johr nochäm Krieg)imma noch ä bissl so, als hedd dess de Hitler noch selwa fä die „Wochäschau“ in Ufftrag gewwä. Der Oidruck wärd noch vaschdärkt durch grobbkärnisch flimmandä Bilda. Zu sehä iss in dämm dreiminidischä Schtreifä vunn alle Seidä de legendäre „Aerobus“, der soinazeit iwwa de Negga vumm Luisä- in de Herzoggäriedpark gfahrä iss. Bsunners schää, die Werwung owwädruff: „Echter Käse aus Holland“. Øm Øføng vumm Film iss ä Buch oigebländ „Ein Fest verändert eine Stadt“ – dess iss wohr hawwisch gedängt – unn laud nausgelacht. Uff dem Film zur „Gaddäschau“ iss bloß äns zu sehä: Beddong! Collini-Center mit Schdeeg vunn hinne, vonnä, owwä unn unnä, die drei Bauschdellä-Krään fä die 75 øgføngenä „NUB“, die Neggaufernordbebauung, de Fernmeldäturm, der bei uns immanoch hardneggisch „de Färnsehturm“ heeßt, unn die zugekachelt Fußgängazonä, domøls de letschdä Schrei. Iss dess nädd herrlich? „Ein Fest verändert eine Stadt“ – dess kønnsch laut sagä! Øn dämm Beddong hawwäma heit noch! Hoffä ma, dass dessmol griena zugeht, – obwohl...

Kontakt: kall@mamo.de