Mannheim. Die „Hausfraa aus Neggara“ hodda widda ämol än Witz aus ihrm Lewä gschiggt. Isch willän eisch nädd vorenthaldä. Die Ladärn vor ihrm Haus hodd Daach unn Nacht gebrennt. Weil mir jo alle Schdrøøm schbarä missä, hoddsä halt bei de Schtadt øgerufä, weil sisch jo sunscht käna kimmert.
Die Nummer vunn de Schdroßäbeleischdung hoddsä glei rauskriggd unn die Fraa ømm Teläføn war rischdisch froindlisch gewesä unn heddsä glei gfrocht, wo dønn dess Lischt brennä deed. Dønn wolldsä awwa Gänaueräs wissä: „Iss dess ä Iwwaschpønnung?“ – „Mähnä Sie misch?“, saachtsä. „Nä, die Ladärn!“, mähnt die Ønna. „Liewi Fraa“, hoddsä gsacht, „woher soll isch dønn dess wissä, isch binn doch kään Elektrikga!“
„A, dess sieht ma doch!“ war die schtedtisch Øntwørt. „Hä? ønn wass sieht ma dønn dess?“ Dess Gschpreesch wer imma seltsøma worrä. „Mähnt die, isch grawwl uff die Leeda unn mess middäm Voltmeda die Schtrømschpønnung vunn derä Ladärn?“, schreibt ma die „Hausfraa vunn Neggara“. Dønn wer die vunn de Schtadt awwa deitlischa worrä: „Iss die Leidung vunn derä Ladärn vunn Haus zu Haus gschpønnt odda isses änn Poschdä, also än Mascht?“
Do iss es erä wie Schubbä aus de Hoor gfallä, wass die vunn de Schtadt midd Iwwaschpønnung mähnt. Hinaheer häddäse dønn allä zwee härzlisch lachä missä – unn die Ladärn wer ømm selwä Daach noch rebariert worrä. Do kennda mol sehä, wie ma midd kurpelzischäm Humor jedi Iwwaschpønnung in de Griff kriggt …
Kontakt: kall@mamo.de
URL dieses Artikels:
https://www.fnweb.de/leben_artikel,-ansichtssache-de-kall-maehnt-isch-binn-naedd-iwwaschp%C3%B8nnt-_arid,2107747.html
Links in diesem Artikel:
[1] https://www.mannheimer-morgen.demailto:kall@mamo.de