Mannheim. Iwwa Gschmagg lossd sisch bekønndlisch nädd schdreidä, heeßds jo. Bei mir iss awwa umgekehrt, isch schdreid iwwa nix so gärn wie iwwa Gschmagg, vor alläm beim Essä. Iwwa de rischdischä Sairä-Grad vunnarä Saua-broodäsooß zum Beischpiel kängt isch Bischa schreiwä. „Dess iss foi, awwa kään Sauabroodä, sunnern än Rindabroodä mit brauna Sooß“, saag isch dønn beischpielsweis.
Dess iss zweeärlei, find isch. Beim Noochdisch geht ma dess a so. „Budding iss dess awwa käna gewesä, allefalls ä Budding-Kräm, gell?“ Isch find hald, dass Gewärz-Graduierungä unn Konsischtänzä beim Kochä uhoimlisch wischdisch sinn. „Dess iss kä Linsäsupp unn a känn Linsäoitopp sunnern än Linsäbrei, macht awwa nix, schmeggä duuds …“
Do hilfd dønn a kään nochtreeglischä Schebba Wassa mehr – unn Froindä, dess kännda eisch vorschdellä, machschda so in de Kisch a nädd. Die Zung deed ma gschabt kehre in moinä beesä Gosch, hodd die Großmudda als gsacht. Mir geht’s do wie äm Loriot: „Isch essäs joo, awwa nädd unna falschäm Nømä!“, weil ä Bärn Helänä numool känn Appl iss, so isses hald unn färdisch. Wønn wass nädd gschmeggt hodd, auswärds meischd, dønn hodd dess „lebsch“, „ødømlisch“ odda a „ädäämlisch“ gschmeggt.
Dass wass, nooch „A … und Friedrisch schmeggt“ hodd ma bei uns wegä dämm A-Wort nädd sagä därfä, so vornähm wahrä mir friah. War wass bsunners faad, dønn hodd dess „wie oigschlofänä Fieß“ gschmeggt. Isch habb misch als Bu schunn gfroogd unn froog misch bis heit, wie – unn vor alläm warum – änna rausgfunnä hodd, wie øigschlofänä Fieß schmeggä. Awwa iwwa Gschmagg soll ma jo bekønndlisch nädd schdreidä, gell? Mønschmol isses a bessa.
Kontakt: kall@mamo.de
URL dieses Artikels:
https://www.fnweb.de/leben_artikel,-ansichtssache-de-kall-maehnt-dess-schmeggt-ma-naedd-_arid,2100384.html
Links in diesem Artikel:
[1] https://www.mannheimer-morgen.demailto:kall@mamo.de