Um zwöflä wärd gessä – ob gekocht iss odda nädd! Dess war unsärm Opa soi Devisä. Unn wønn mir als sunndags middäm Essä gøngä sinn, in de Odäwald zum Grinä Bøøm odda in de Gaul nooch Waldhilsbach, dønn hodd als schunn glei noochäm Friehschdick losgfahrä wärrä missä, „damit ma bei Zeit dort sinn“ unn um halwä zwölfä glei beschdellä kännä, weil „um zwölfä... – ihr wisst jo.“
S’iss schunn so ä Sach middäm Essä in ännarä Wohlstøndsgsellschaft. Moinä Schwegarin, zum Beischbiel, derä iss de gønzä Daag „ga nädd wisselässwohl“, kønn awwa „middäm gønz klänä Dellalä“ värzäh Mol zum Biffee laafä, wønn’s soi muss. Die Døndä Mäus hodd imma ausnøhmslos die Pommfritt in Krokeddä umbestellt, weil die „nädd so fett – unn bessa fä die Gall“ werä. De Ungl Hoina hodd imma gfeixt: „Hajoo, die Krokeddä werrä jo a in de Wassa-Fridees gemacht, gell ?“ Trotzdämm hosch disch a beim Hoina wunnarä kännä, wass die Bedienung beigschleppt hodd, wønna øgeblisch bloos „ä Klänischkeit“ bschdellt hodd. Hunga iss ä traurischi Sach – bloß in de Kurpalz kännsch disch bei dääm Thäma als kaputtlachä ...
Kontakt: kall@mamo.de
URL dieses Artikels:
https://www.fnweb.de/leben_artikel,-ansichtssache-de-kall-maehnt-hunga-im-kwadrat-_arid,2112523.html
Links in diesem Artikel:
[1] https://www.mannheimer-morgen.demailto:kall@mamo.de