Kennda eisch noch øn die Øschpønnung erinnärn, wønn da als klänä Krutzä odda a als Halbwiegsischa wass furschbar wischdisch war unn du hosch die Eldärn um Alaubnis froogä missä? Also zum Beischpiel, ob dess odda jänäs Gebordsdaagsgschänk drin wer. („Kummt nädd in Froog, so än Kees kaafä ma nädd.“ ) Odda ob de midd dämm unn jänäm middäm Rad uff Weltreis geheä därfsch, also øn de See nooch Heddäsä. („Hosch du kä Hausuffgawä zu machä?“) Odda ob der odda die heit bei uns iwwanachdä därf, odda umgehkehrt. Unn die Party neggsch Woch... Die onnarä därfä a alle! („Ønnarä Kinna intressierä uns nädd!) Wønn die Øntwørd awwa positiv war, hodd dess nädd „Ja, klar“ kheeße, sunnern „Vunn mir aus.“
Die Grenzfell warä die knifflischsdä: „Dess seh ma dønn!“ Meischd warä dess die Fell, wo der änä odda di ønna Ärziehungsberäschdischä gemähnt hodd, dess misst noch unnaränønna beschprochä wärrä, also zwischä Vadda unn Mudda. Dess hodd nix Gudäs kheeße. Allä Vasuchä midd „De Babba lossd misch...“ odda „Die Mamma deed misch bschdimmt lossä!“ warä zwecklos: „Dess seh’ ma dønn!“ Hosch doi Gligg weida vasucht, iss noch ä „Isch habbda gsacht,...“ dävor gsetzt worrä. Weidarä Noochfrøgä heddä dønn zu ännarä „schnellä Øntwørd“ gfiehrt: „Wønns schnell gehä muss, simma glei färdisch!“ Do war äm dønn doch sogar „dess seh ma dønn“ noch liewa ...
Kontakt: kall@mamo.de
URL dieses Artikels:
https://www.fnweb.de/kultur_artikel,-kultur-de-kall-maehnt-dess-seh-ma-donn-_arid,2093071.html
Links in diesem Artikel:
[1] https://www.mannheimer-morgen.demailto:kall@mamo.de