Mannheim. Jawoll, ihr habbd rischdisch gelesä, Meeschda simma. Nää, die Adla nädd, isch weeß. Unn a beim Waldhof wärd’s – vorsischdisch ausgedriggt – noch ä weilschä dauern, bisses mol so weid iss. Awwa immahie, also wønn’s um die Wørschd geht, do simma a uffm Waldhof Meeschda, deitscha Meeschda, jawoll! Do hoggd nämlisch middm Philipp Burkhardt de ømtierändä deitschä Weißwørschdmeeschda, schunn fünf Mol hinnaränonna hodd der dä Pokal abgeroimt, unn nädd bloß dänn, ob Kurpelza Rotwørschd odda Zungäblutwørschd, Rindasalømi unn was weeß isch noch alles – fuffzäh mol Gold hodda kholt, der Waldhof Bu midd soinä 30 Johr. Unn somidd sinn mir Mønnema jo allä ä bissl schpitzä, mähnt da nädd a?
Vor alläm wärd domit ä aldi Schmaach widda gut gemacht: De Fleeschkees, denn se da in Bayern als „Leberkaas“ vakaafä, hodd jo de Mønnema Hofmetzga vumm Kall-Theodor erfunnä. Heersch nix dävu in Bayern. Dess vagessä die Wischdl in ihrä Leddahossä nur allzu gärn.
Mir machäs jetz s ä bissl wie die klänä Schweiza in derä „Ricola“-Färnseh-Werwung: Musch die Bayern so vunn unnä øm Ärml odda de Bayern-Minschä-Krawatt zopplä unn so uff Schwiezerdüütsch machä: „Wärrr hadds errfundän???“ Genau: Die Mønnema! Also wønna mol widda än Baazi seht, der wo sisch uffblosä duud vunn wegä „Mir sann mir!“ unn „Weiß, Blau“ unn so, dønn klehrt da dänn ä mol uff: Ärschdäns, mir hawwe 1777 Bayern geerbt – unn nädd die uns. Zweddäns: Was hodd unsann Kurfärschd gemacht, wie a erfahrä hodd, dassa jetz nooch Minschä ziehä muss? Kheilt hodda! Drittäns: De eschdä Weißworschdhimmel iss nädd weiß-blau, sondärnrn uffm Waldhof blau-schwarz! „Hossdmi?"
Kontakt: kall@mamo.de
URL dieses Artikels:
https://www.fnweb.de/leben_artikel,-ansichtssache-de-kall-maehnt-mir-sinn-meeschda-_arid,2085794.html
Links in diesem Artikel:
[1] https://www.mannheimer-morgen.demailto:kall@mamo.de