Wie die Brunnäbutza

Isch weeß da a nädd, warum mir als wass wie løng im Kopp rumgeht. Do heer odda seh isch wass – und bumms, kängt isch misch wocheløng midd nix ønnaräm befassä. In dämm Fall iss glaawisch die Zeidung schuld. Isch habb do wass gelesä iwwa die Sønierung vunn de Wassaturm-Føndänä, also derrä härrllischä Brunnäølaag øm Mønnema Friedrischsplatz. Unn a arg viel iwwa die feischdä Schdellä bei de BUGA, also arg viel BUGA liest ma jo derweil, gell? Newam Kutza- weia, gibt’s do nadierlisch uff alle zwee Bundäsgaddäschaugeländä arg viel Wassaschdellä, die Leit liewä jo’s Wassa, gell. Wo Wassa iss, iss Lewä, hajoo! In Mønnem awwa, ihr Leit, vaschwind dess Wassa imma schnell. Nädd bloos durch die Teischfolie uff Schpinelli, nä, äfach so: Wies Geld fortgeht, vasiggat a s’Wassa – s’iss logisch unn doch kømisch. Die finnä offiziell imma ønnarä Grind. Im Härbschd ärschd hawwä se uff de Seggema Pløngä den „Zabbe-Brunnä“ oigeweiht – awwa ohne Wassa. Do wer känn Platz im Boddä, hodds khesä – glaabt ihr dess? Geh ma mol durch die Schtadt: Laaft de Schbarglbrunnä in Keffadaal eigändlisch widda? Troggä liggt ä Brunnä-Armutszeigniss in de Traideerschdrooß in de Schwetzingavorschtadt – seit Johrä. Geh ma uff die Pløngä: kä Wassa nirgends. Der „Eleføndä-Friedhof“ vunn O 7 (mit soim traurischä Rinnsaal) iss genausso fortkummä wie der Brunnä vor P4 – ärschd die blauä (BUGA)-Plastikkugglä, Johrä schpeeda, donn dess gonzä Ding. Vakummä, abgschdellt, fortgerøhmt – unn dess wo in Mønnem „Schaffä wie die Brunnäbutzä“ eigändlisch ä Kompliment iss. Ønnarsch formuliert: Mønnem hodd ä Brunnä-Probläm. Isch deed schtedtäbaulisch eha rodä: Wassa Marsch! Unn BUGA – uffgebasst...

Kontakt: kall@mamo.de