Als førd, Frønkførd!“ Dess ruft ma bei uns Leit zu, die großä Plän unn Ideä hawwä unn dännä bei uns in de Kurpalz die Welt zu klää wärd. „Als førd, Frønkførd!“ heeßd, geh, awwa geh midd Gott, wie „Hänschen klein, in die weite Welt hinein“. Probier disch aus, loss da de Wind um die Naas wehä, mach wass de willsch, awwa heer ma uff, rumzumaulä unn unser Kurpalz fer zu klä, zu eng odda zu bleed zu erklärä! So in etwa iss der Schpruch zu vaschdehä.
Frønkførd iss nadierlisch, vunn uns aus wie a hisdorisch gsehä, imma die groß weit Welt gewesä. Dodämit hawwä mir a kää Probläm. Mir hawwä ä gønz ønnaräs Probläm. Nämlisch dess, ärschdämol nooch Frønkførd zu kummä. Unn vunn dortaus dønn noch weida in die Welt. Isch weeß da ga nädd, wie oft isch nooch Frønkførd wollt – unn in Bärschdä odda Lømbaddä gschønnä bin!
Vorgeschdärn iss dønn kwasi alles zusømmäkummä. Aus vier Himmels- odda bessa Eländsrischdungä. Unn die heeßä so: Deutsche Bahn, Telekom, Lufthansa unn Verdi! Do weesch dønn schunn bscheid: Nix geht mehr. Wønn de Zug fahrt, gehe die Signale wegä Indernedd nädd. Wønn die Glasfasa funzt, fahrd de Zug nädd odda s’Gleis iss hie. Die Lufthansa watt uff die ännä odda die ønnara, weil se entweda s’Personal odda die Fluggeschd nädd beibringä – unn wønnämol alles laafä duud, schtreikt hald widda irgendjemond vumm Bord- odda Boddä-Personal. Als førd, Frønkførd? Heerma uff, geh ford, isch bleib dähääm!
Kontakt: kall@mamo.de
URL dieses Artikels:
https://www.fnweb.de/leben_artikel,-ansichtssache-isch-bleib-daehaeaem-_arid,2052302.html
Links in diesem Artikel:
[1] https://www.mannheimer-morgen.demailto:kall@mamo.de