Isch dreh øm Rad!

Alt wärrä, so sagä die Leit midd Räschd, iss jo nix fär Feigling, gell. Odda wie moi ehemolischi Nochbärn imma gsacht hodd: „Isch sag Ihnä, wønndä in moim Alda morgäns uffwachsch unn s’duuda nix weh – dønn bisch hie!“ Schunn moi Großmudda hodd misch gewørnt: „Buwl, därfsch alles wärrä im Lewä – bloß nädd alt!“ Dess hawwisch domools nädd vaschdonnä. Heid schunn. Awwa isch will nädd jommarä unn jämarrä, kumm her, geh fort, s’geht ma jo gut soweit. Awwa s’gibt so ä nei-modärnäs Phänomähn, do wärdda vor Aagä gfihrt, wie ald dä bischd. Wønn de heidzudaag uffm Händy odda im Indanett was beschdellä, ausfillä odda bezahlä willsch, musch jo doi Dadä oiewää, nädd wohr? Do kummsch dønn uweigalisch a øn die Oischdellungä middäm Gebørdsjohr. Do kønsch awwä nädd grad 19-Hunnert-Zahl-Zahl oigewwä, schä wers. Nee, du musch wie øn so äm Reedschä dreha, wose disch die Johrgäng vunn 2023 bis 1900 zurigg schpuhlä lossä wie øn so ähm ä-armischä Bøndit im Schpiel-casino. Nädd gønz sauwa sinn die! Do dreschdä än Wolf bissde zu doinä Johrgäng kummsch! Hepp, hepp, hepp, hepp drehsch øm Rad – unn bisch als noch dreißisch Johr vunn doim Johrgøng entfärnt. Dess iss Boomer- unn Seniorä-Mobbing, do binn isch ma sischa! Leid, ma missä wass unnanämmä, bevor ma völlisch øm Rad drehä! Dess mähnt

Kontakt: kall@mamo.de