Ä Bloomaul weeß: „Die beschd Krønkheid daugt nix!“ Dess wissä allä, die’s schunn mol „hiegelegt hodd“– unn domit sinn nädd bloß Schdärz gemähnt, also nädd nur Knochäbrisch, Vaschdauchungä, Bändariss unn so weida. Isch mähn jeglischä Vorfell im Gsundheitswesä, freilisch a die vunn Bøndscheiwä. Wønn jemønd länga krønk war, hodd moi Großdøndä gsacht „Der hodd feschd gelegä.“ Bei de Großmudda hodd so änna „schwer gelegä“. Egal wie ma saagt, øm alla schlimmschdä iss dønn, wønnsä disch „oiliefärn“, also nädd bloß in die Klappsmihl, sunnärn in jeglischäs Krøngähaus.
Do, ønnemä Ort, wo freiwillisch sowieso känna hie will, solläsä jo Kunschschdiggä vollbringä, sollä disch reparierä, fitt machä, uffbebblä – unn debei noch Geld schbarä. Deswegä is haldd imma än Haufä Zierguss. Awwa jetz hawwäse de Voggl abgschossä: Owacht! Die Asklepios Kliniggä in Hømburg hawwä ihrä Patziendä jetz aus Schbargründä die Budda gschrischä! Zum Friehschdick unn Øwendessä gibt’s bloß noch Maggarinä, konnsch do noch? Øm Kundä schpart sischs hald imma noch am beschdä. Däbei sollä die Leit doch uffgebaut unn gsund wärrä. Isch wissd nädd, wass do besser wer als „gudi Budda“, s’inn jo eh bloß so kläne, abgepackdä Portionä, also ä gsunheitsvatreeglischä Dosis. Bassd’ma bloß uff in de Kurpalz, gell! Mir lossä uns jedenfalls nädd die Budda vumm Brot nämmä! Nädd vunn Norddeitschä – unn schunn ganädd wømma krønk sinn!
Kontakt: kall@mamo.de
URL dieses Artikels:
https://www.fnweb.de/kultur_artikel,-kultur-de-kall-maehnt-awwa-biddae-midd-budda-_arid,2044652.html
Links in diesem Artikel:
[1] https://www.mannheimer-morgen.demailto:kall@mamo.de