Ihr liewä Leit, bekønntlisch hawwä mir, jeda änzelnä unn jedi änzelni vunn uns, jo so unsa Maggä. Isch will eisch heit mol widda vunn moinä Großmudda vazehlä. Dess wa ä guudi unn liewi Fraa, freundlisch gegä jedamønn unn a sunschd räschd patänt. S’hodd awwa a bei ihr ä Sachä gewwä, do iss unsa Oma ausgflippt. Wønn se inämmä Café ä Schdick Kuchä hiegschdellt kriggt hodd, wo ä Gawwl dringschdeckt war, iss ä Bomb geplatzt. Die Bedienung hodd dønn de Katz kehrt. Und dess, obwohlse genau gewissd hodd, dass die dänn Kuchä jo meischdäns ga nädd selwa so hergerischt hodd, sondärn derä ihr Kollgein am Biffee. Wønn die Gawwl so schreeg vunn de Seit newä, middäm Riggä nooch owwä gschdeckt hodd (unn so halb noch uffm Della uffgelegä war), isses als noch gøngä, ma hoddse dønn noch besänfdischä kännä. Wønn awwa – unn dess iss alsä mol vorkummä, wønn ä Aushilf odda ä neii Kraft im Oisatz war – die Gawwl vunn owwä senkräschd dringschdoggä hodd, wars gønz aus: „Wa do schunn änna drø, odda wass? Wie sieht dønn dess aus? Kummä Sie vumm Lønd? Jungi Fraa, dess iss känn Mischdhaufä middärä Mischdgawwl, sondern ä Schdick Kräm-Tort fä vier Mark fuffzisch! Machä se dess bei sich dehäm a so? Dess kennä se glei widda mitnämmä! Unn dønn schiggä se ma die Fraa Kiemlä, awwa glei!“ . Isch sach bloß: Främdschämä fä Änkl, Deil ääns. Awwa sunschs, glaabd’mas trotzdäm, war se wirklisch klor, unnsa Oma.
Kontakt: kall@mamo.de
URL dieses Artikels:
https://www.fnweb.de/leben_artikel,-ansichtssache-de-kall-maehnt-kae-gawwl-im-kuchae-_arid,2135979.html
Links in diesem Artikel:
[1] https://www.mannheimer-morgen.demailto:kall@mamo.de