De Kall mähnt: Wass issn so ä Closing?

Ihr Leit, holt die Daschädischa raus, s’gibt wass zu heilä! Morgä macht die Bundesgaddäschau in Mønnem discht. Dess war’s dønn middä Buga23 unn isch mähn: Schää war’s! 178 Daag Summafeschd sinn vøbei, iwwa 6000 Vaøschdaldungä hodds gewwä, dess iss än Haufä Holz. Also muss jetzt nadierlisch a gfeiert wärä: „Closing“ heeßd so wass neideitsch, also änglisch. Uff Deitsch iss dess nix ønnaräs wie än Abschluss. Schluss midd lusdisch, aus, färdisch, discht wärd gemacht, nadierlisch nädd alles, nur’s Vaøschdaldungsprogrømm. Isch muss sagä, dass isch nädd wänisch Leit kenn, die rischdisch Schbass khappt hawwä, bei de Konzerdä zum Beischpiel – øn lauä Summaøbendä unn soga bei Regä. Dännä wärd jetzt zwar bissl flau ums Härz, awwa gfeirt muss dess nadierlisch trotzdäm werrä.

Der Daag føngt desdawegä midd Singä ø unn heerd midd Singä uff: Um zwölfä, (glei nooch äm Rønzä-intänsiv-Träning vumm Pfitzämeier) iss ökumänischa Abschlussgottesdienscht im Meeglischkeitsgaddä, owänds um achdä iss dønn dess große Abschluss-„Ivänt“ middäm Konzert vumm, wie heeßda, genau, Dominik Eulberg.

Isch weeß nädd, wie’s eisch geht, awwa isch hab vieles nädd gschafft, wass isch ma vorgenummä habb. Uff dämm roschdischä Schteeg, bei de Fisch unn beim Gringo Meyer-Konzert war isch nädd, dess iss schad. Isch dänk, eisch wärdes ähnlisch gehä. 1975 binn isch noch uff de Bell rumgschprungä, dess hedd isch dess mol vumm Kreiz heer ganimmi hiegebrocht, däfir hab isch domols noch kä Riesling-schollä gädrungä – so ännern sisch hald die Zeidä unn ma selwa. Wass isch uff de Buga vunn de Leit kehrt habb, kännda eisch nochmol in unsärm Filmschä øguggä. Wer weeß, vielleisch erleb isch jo im Methusaläm-Alter noch ä dritti Buga. Ma wärrä sehä... Bis dohi, frohes „Closing“!

Kontakt: kall@mamo.de, Video: www.youtube.com/ mannheimer-morgen