De Kall mähnt: Die gelb Wønd

Neilisch war isch midd ä paa Kolleegä in de Kønntiin khoggd. Die änd iss kummä, de neggschdä schunn grad glei widda gøngä, wie’s hald so geht, wo ma schaffä geht unn jeda soi Tärminä unn Sitzungä unn Zeisch zu machä hodd. Isch saach dess desshalb, weil ma wissä muss, dass do nadierlisch nädd alles, wass do øn Gschpreeschs-thämä uff de (Middags-) Disch kummt, jeda vunn Øføng biss Änd vafolgä kønn. Moin Kolleesch, Böörni heeßda, vazehlt wass vunnarä gelwä Wønd unn dass soi Fraa die unbedingt ämol sehä will. Dänn Oischdieg hawwisch nädd middkriggd, wunna misch awwa. Dämm soi Fraa hawwisch schunn ä paarmol gsehä, die hoddma sellämols än symbadischä unn normalä Oidruck gemacht. Isch wunna misch – unn horsch weida zu. Dess kängt ma mol im Urlaub ins Aag fassä odda erä vielleischd a mol zum Gebørdsdaag schängä, mähnta, de Böörni. Isch denk: Warum, kønn dønn der soi Fraa nädd leidä? Dess iss doch kä Gschenk, sondärn ä Zumudung!

„Isch kønn prinzipiell schunn nädd vaschdehä, wie ma iwwahaupt uff die Idee kummä kønn, ä Wøond gelb øzuschdreischä!“, saag isch. Awwa isch woll jo jetz ä Eh räddä unn saag: „Hoorsch zu, Böörni, kaaf doinä Fraa liewa wass Schänäs unn kummd ä mol zu zwedd zu mir. Do kriggda ä Gleesl Sekt, ma gehä uff de Balkøng – unn doi Fraa därf bei mir so løng uff die Hauswønd gegäiwwa guggä, wiesä lusdisch iss. Der Hutsimbl vunnämä Hausbesitza dodriwwä hodd soi Hitt nämlich knallgeel øbinslä lossä, dass ma morgäns beim Frihschdigg schunn ä Sunnebrill uffsetze meschd. Iss dess ä Øgebot, hä?“ Dønn iss pletzlisch Ruh. De gønzä Disch guckt misch ø, als wer isch nädd gønz sauwa. Vunn Fußball, vunn Dortmund, de legendärä Gelwä Wønd deddäse räddä, vunn derä berihmdä Tribihn vunn de Borussia, wo die Fäns die Vaoins-Faab hochhaldä unn Muschda machä unn so Sach... Die Fraa wer Fußball-Fan und deed sisch äfach gärn Schtadie øguggä. Isch wa gebleddld – unn wees biss heid nädd, wer ma jetz mehr leidduä soll, de Böörni odda soi Fraa?

Kontakt: kall@mamo.de