De Kall mähnt: Ma waddä liewa ä bissl...

2023 is Wahljohr, fä unsann Häbbädd zehld awwa blooß äns: die Mønnema Owwabirgameeschda-Wahl im Juni. „Isch glaab als, die wollä nädd rischdisch!“ So mähnt’da neilisch øm Schdømmdisch. „Ah jetzt mol ehrlisch, beim Kørzä Peeda war’s doch ä Elend: Erschd hodd’s kheeße, im Friehjohr 22 deeda Bscheid sagä, obbas macht, nää, dønn doch liewa ärschd im Summa. Dønn iss Härbschd worrä, bissa Bscheid gewwä hodd, dassas nimmee macht.“

Isch guggän ø: „Joo alla, s’gibt jo awwa schunn än neiä Køndidaad, der wo wollä duud. Wass hoschdä dønn, Häbädd?“ Do schnaubtda. „Hosch wass vunn de Grienä kehrt, hä? Die wärra sich – noch kä halb Johr biss zur Wahl – schoint’s a nädd ähnisch wännsä ins Rännä schiggä. Odda obsä iwwahaupt Luschd hawwä, mittzuschpielä...“

Do falldäm vunn hinnä de Wänna, unsann Wärd, ins Wørd: „Die grien Theresia Bauer macht’s! Die hoddjo jetz Zeit, wo’s bei de Neggaschloima in Heidlbärg driwwä nix worrä iss midd Owwabirgameschderin!“ Do lacht’da, de Häbbädd, weil änn die Vorschdellung so amisiert, dass änni, die in Schtuttgadd unn Heidlbärg rumgschdochert hodd, in Mønnem jemols wass wärrä kängt.

„Unn die CDU, hä?“, will de Häbädd weidamachä. De Wänna widda vunn hinnä: „Bei dännä iss wie Woihnachdä – dess kummt a imma so pletzlisch: Wass? Schunn widda OB-Wahl? Warum hodd uns dess känna gsacht!“ Isch muss lachä, de Häbädd a: „Gänau! Unn dønn ziehäsä ä paar Wochä vor de Wahl änner hinnerm Busch vor, vunn dem noch nie änna wass kehrt hodd, dem soi Ururoma awwa vor hunnert Jøhr ä gøøøønz beriehmdes Kaffee in Mønnem khappt hawwä soll..., irgendso än Wellereida, Roseberga, Oddo odda so...“

De Wänna mähnt: „Däbei heddesä dessmol jø änn gscheidä Kønnidat, änn eschdä Mønnema, Waldheffa noch däzu! Awwa nix. Mir waddäa liewa noch ä bissl...“ „Nää“, sagt de Häbbädd, s’iss, wie isch saag: „Die wollä nädd so rischdisch!“ Wønna mähnt...

Kontakt: kall@mamo.de