De Kall mähnt: Kä Leuschdä im Tunnl

Heeer, kønnsch do noch?!“ Wønn änna so die Dier noikummt, weeschd Bscheid. „De Häbbädd widda!“, dängä ma øm Schdømmdisch. „Wass dønn los iss, willa wissä, de Wänna, unsern Wärd, nadierlisch nädd øhnä dänn Hieweis, dass ma ärschdämol „Tach“ sacht, womma wo noikummt, a wønns bloß ä Beiz iss. „Hosch jo Räschd, awwa wass sagtdann zu derrä Numma middäm Fahrlachtunnl, hä?“ Løngäs Schweigä. „Kännsch du änna, dämm dodäzu noch wass oifallt?“, mähnt de Wänna unn geht in soi Kisch hinnädrinn, woa wass zu bosslä hodd.

Ma wissd nimmee, wer, wass, wønn falsch beräschnt, genähmischt unn vabockt hodd, heeßds. „Schdellt eisch dessämol vor, wie do fä unnsa Geld gschafft wärd!“ „Ä Uuding“, wär dess, sagt de Pelza, „so wass gibts blooß in Mønnem, mähnt de Ginnda. „Soga de Gemoindärat wer fassungslos, wie do gschlømbt worrä iss“ unn de Pelza do druff: „Und dozu brauchts Øinischäs!“ Do rufts aus Rischdung Thek, vunn gonz weit hinnä aus de Kisch: „Quatsch heeßda!“ Isch ruf zurigg: „Joo, Wänna, dess wissä ma doch“, unn will misch weida unnahaldä, do kreischts vunn hinnä schunn widda: „Quatsch heeßda! Nädd vagessä, gell?“ Nadierlisch missäma do lachä, weil ma wissä, dass der pännsionierdä Mønn in Wirklischkeit Quast heeßt unn a, dass unsann Wänna dänn ehemolischä Baubirgameeschda gfresse hodd. „Dess war de änzischä Baubirgameeschda, dämm soi Teschnischäs Rathaus unnerm hinnarä weggfault iss“, mähnt de Ginnda. Unn de Häbbädd : „Hajoo unn jetz hawwäse sisch ä goldenes uffm Lindähof gebaut. Wissda, wass awwa in Sachä Tunnl s’Beschdä iss? Die Zuschtändischkeit fä Tiefbau hodd middlaweil s’Ressort gewechselt. Dess macht jetzt die Bräzzl, vunn de Umwelt!“ De Ginda feixt: „Odda de Grunert vunn de Bildung, wønnse nädd do iss.“ Mir lachä hald. In Sachä Bauschdellä iss Umschtrukdurierung ä foini Sach, gell? Vunn hinnä aus de Kitsch rufts wie Dunnahall: „Quatsch, saag isch, heeßda!“

Kontakt: kall@mamo.de